28 juin 2008
ناري علقار!
محمد بشار
نَارِِي عَلْعَقـَارْ
نَارِِي نَارِِي عَلْعَقَارْ
رَْاه دار جْناحْ
فْ لهوا حلّق وطار
من سْْماه طل بٱحتقار
قهقه وقال:
ياكحْلين الرّاس
مال الدار دايْرا لكم الوسْواسْْ
علاش التخمام بلا قياس ؟
مالكم و صداع الراس ؟
والسْهير وقلة النعاس ؟
ريْحو البال وهنيوْ صحاب المال
نساوْ هم الملكية
نساوْ قبر الدنيا
.............
على بغثة وبلا إنذار
بلا حدود فاضت لسعار
الشقة،البقعة،الدار...
فثمانها شعلات النار
(Le noir) وزادها صهد، حر نْوار
الربح لحرامي عْما لبْصار
الصدمة كانت كبيرة
على صحاب الجيوب الصغيرة
الشابات والشبان
طاحو فحيرة
حلامهم الجميلة
ف الحب والزواج ولستقرار
بين يوم وليلة
صبحات مستحيلة
ولات سراب وبخار
.............
الميتر من المحتاج يسخر
ويقولو بعّد ألكِدار
الوقت عليك قصاح
وزمان صحاب السنتيم راح
مابقى سكن اقتصادي
لا تسهيلات ولا كريدي
ديك الحجاية صارت ماضي
هناتنا وعطاتناالتيقار
.............
هذا وقت المشاريع لكبيرة
بحال دار ضيافة،أطيل أو بار
اللي تْبِِِيض فلوس ساهلة وكثيرة
بالريال والأورو والدولار
راه عيب وعار
الأرض اللي تفيد الناس لكبار
تضيع فحانوت ، كراج أو دار
واش ماشي حرام
صحاب لفلوس لكثار
يتحرمو من تضحية الاستثمار
راه خاص فلوسهم تدور وتزكى
باش هذا السادة
يتفطحو بلا عنا بلا شقا
باركا من لحسد ولغيار
باركا من النگير ولبكا
يامزاليط كلها فقنتو يتكا
ٱش بينكم وبين الشقة
.............
الرباط في 25 فبراير 2008
